Pennad tri

An dorn dizehet

¹ Antreal a ra adarre er zinagogenn. Bez’ e oa eno eun den gand eun dom dizehet. ² E spia a reent : daoust hag edo o vond da barea da zevez ar zabad ? Ha kement-se evid e damall.

³ Lavared a ra d’an den dizehet e zorn : « Sav er hreiz ! » ⁴ ha dezo : « Daoust hag aotreet eo, d’ar zabad, ober ar vad pean droug, savetei eur vuhez pe he laza ? » Tevel a reent.

⁵ Selled a ra outo tro-war-dro, gand kounnar, mantret gand o halonou kaled. Hag e lavar d’an den : « Astenn da zorn ! » E astenn a ra, ha pareet eo an dorn. ⁶ Eet er-mêz, e talh ar farizianed kuzul dioustu gand an heriodianed, a-eneb dezañ, evid e gas da goll.

Parea a ra eur bern tud

⁷ Jezuz en em denn war-zu ar mor, gand e ziskibien. Mond a ra d’e heul eur mell engroez euz Bro-Halile. Hag euz Bro-Jude, ⁸ euz Jeruzalem, euz an Idume, euz an tu all d’ar Jourdan, euz tro-war-dro Tir ha Sidon, e teu eur bern tud davetañ, goude beza klevet ano euz ar pez a ra.

⁹ Lavared a ra d’e ziskibien ma vo eur vagig dalhet dezañ, en abeg d’an engroez, evid na vo ket gwasket ganto. ¹⁰ Rag parea a ra kalz anezo, ken e kouezont wamañ, evid ma vo touchet outañ gand an oll re o-doa poaniou. ¹¹ Ar sperejou dihlan, p’e welont, a gouez dirazañ hag a youh, en eur lavared : « Mab Doue out-te ! » ¹² O skandala groñs a ra, evid na vo ket diskuliet ganto.

Dibaba a ra an daouzeg

¹³ Pignada ra war ar menez, ha gelver en e gichenn ar re a felle dezañ : mond a reont davetañ. ¹⁴ Kemer a ra daouzeg anezo, evid ma vint gantañ ha ma vint kaset da brezeg ¹⁵ ha da gaoud galloud evid taoler an diaouled er-mêz.

¹⁶ Ober a ra an daouzeg ; da Zimon e lak eun ano : Pèr ; ¹⁷ Jakez, mab da Zebede, ha Yann, breur da Jakez, ha lakaad a ra dezo eun ano : Boanergez, da lavared eo : Mibien-ar-Gurun ; ¹⁸ Andreo, Filip, Berteleme, Maze, Tomaz, Jakez, mab Alfe, Tade, Simon ar Hananean, ¹⁹ ha Judaz Iskariot, dres an hini e-neus e werzet.

Diskianti a ra

²⁰ Ha dond a ra d’an ti. Ar boblad-tud en em vod adarre, ken ne hellont ket mui debri o bara. ²¹ O veza klevet ano euz an dra-ze, e teu e dud er-mêz evid paka krog ennañ, rag lavared a reent : « Diskianti a ra. »

Eur rouantelez disrannet

²² Ar skriverien, ar re a oa diskennet euz Jeruzalem, a lavare : « Beelzeboul a zo gantañ ! Dre vestr an diaouled eo e taol-eñ an diaouled er-mêz. » ²³ O gelver a ra davetañ, ha dre barabolennou e lavare dezo : « Penaoz e hell Satan taoler Satan er-mêz ? ²⁴ Ma vez disrannet eur rouantelez enni heh-unan, ne hell ket ar rouantelez-se padoud. ²⁵ Ha ma vez disrannet eun ti ennañ e-unan, ne hell ket an ti-ze padoud. ²⁶ Ma ’n em zav Satan a-eneb dezañ e-unan, ha ma vez disrannet, ne hell ket padoud, med echu eo gantañ. »

An den krenv skrapet

²⁷ « Med ne hell den ebed antreal e ti eun den kreñv ha skrapa e vadou digantañ, ma ne liamm ket an den kreñv da genta. Ha neuze e skrapo e di.

²⁸ Amen, lavared a ran deoh : pardonet e vo pep tra da vibien an dud, ar pehejou, ar geriou disakr, kement ha ma tisakreint. ²⁹ Med nep piou bennag e-eno disakret a-eneb ar Spered, an hini santel, n’eus pardon ebed evitañ e-doug ar beurbadelez, med kabluz eo gand eur pehed peurbaduz. » ³⁰ En abeg ma lavarent : « Eur spered dihlan a zo gantañ. »

Ma mamm ha ma breudeur

³¹ Dond a ra e vamm hag e vreudeur. Chom a reont er-mêz ha kas kelou dezañ evid e helver. ³² Bez’ e oa eur boblad-tud azezet en-dro dezañ. Hag int da lavared dezañ : « Setu da vamm, da vreudeur ha da hoarezed, er-mêz, ouz da glask. »

³³ Respont a ra dezo en eur lavared : « Piou eo ma mamm ha ma breudeur ? » ³⁴ Hag o selled tro-war-dro ouz ar re a zo azezet e kelh, e lavar : « Setu amañ ma mamm ha ma breudeur. ³⁵ Nep piou bennag a ra bolontez Doue, hennez a zo breur, c’hoar ha mamm din-me. »